MANILA, Philippines — Magiging abala ang Team Philippines sa susunod na taon kaya’t ngayon pa lang ay pinaplantsa na ng Philippine Sports Commission (PSC) ang lahat para sa taong 2023.
Siyam na malalaking international competitions ang pinaghahandaan ng national team kabilang na ang naudlot na Asian Games na inilipat sa Setyembre sa 2023 sa Hangzhou, China.
Kaya naman humiling ang PSC ng mahigit P546 milyong pondo sa Department of Budget and Management (DBM) para sa lima sa siyam na international competitions na lalahukan nito. May P100 milyong pondo ang ilalaan sa Asian Games.
Lalahukan din ng Team Philippines ang 32nd Southeast Asian Games sa Phnom Penh, Cambodia sa Mayo 2 hanggang 16, 2023.
“We are hoping that the proposed budget will be approved by our country’s leaders. As a former athlete, the unwavering support of the government along with the full backing of the Filipino people are vital for our success,” ani PSC Commissioner and Officer-in-Charge Bong Coo.
Maliban sa Asian Games at SEA Games, pinaghahandaan din ang Asean Para Games at Asian Para Games.
May dalawang torneo rin na pinaghandaan ang Pilipinas gaya ng FIBA World Cup at FIFA World Cup.
Ang iba pang international tournaments ay ang 4th World Combat Games sa Riyadh, Saudi Arabia sa Oktubre 5 hanggang 14, 2023 (P72 million), 6th Asian Indoor and Martial Arts Games sa Bangkok, Thailand sa Nobyembre 17 hanggang 26, 2023 (P67 million), at ang 2nd World Beach Games sa Bali, Indonesia sa Agosto 5 hanggang 17 (P56 milyon).
Date: August 24, 2022 | By: Chris Co | Newspaper: PhilStar Pang-Masa | Source: https://www.philstar.com/pang-masa/pm-sports/2022/08/24/2204665/2023-budget-inihahanda-na-ng-psc?fbclid=IwAR120A5s8clhoMBW4QcGEox2-vwcFpTGFnIH2ln9_EEWKHRnvPyNs6NivtM
