MANILA, Philippines — Kumolekta si Pinoy gymnast Carlos Yulo ng pinagsamang 41.833 points sa tatlong apparatus para banderahan ang individual all-around event ng 9th Asian Senior Gymnastics Championships sa Doha, Qatar.
Nanguna ang two-time world champion sa floor exercise sa kanyang 14.800 points habang nagtala siya ng 12.933 points sa pommel horse at 14.100 points sa still rings.
Kasunod ni Yulo, sumabak sa nakaraang Tokyo Olympic Games, sina Chinese bets Yin Dehang (41.800 points) at Yang Jinxiang (41.700 points).
Dahil dito ay umabante ang 22-anyos na si Yulo sa apparatus finals ng floor exercise bilang first-placer, pang-anim sa still rings at pang-20 sa pommel horse.
Sasalang pa si Yulo at ang iba pang partisipante sa vault, parallel bars at horizontal bar na magdedetermina sa kukuha sa gold medal sa all-around event.
Nagmula si Yulo sa pagkolekta ng limang gold at dalawang silver medals sa nakaraang 31st Vietnam SEA Games.
Date: June 17, 2022 | By: Russell Cadayona | Newspaper: Philippine Star | Source: https://www.philstar.com/pang-masa/pm-sports/2022/06/17/2188971/yulo-bumandera-sa-asian-gymnastics-meet?fbclid=IwAR1jzLw9D5mfjDipDr25sdVciwtqj32fB0Bywmzht2kXPHo-7GslvX2opmM