MANILA, Philippines — Kasabay na bababa sa posisyon ni Pangulong Rodrigo Duterte sa Malacañang si chairman William ‘Butch’ Ramirez sa Philippine Sports Commission (PSC) sa Hunyo 30.
Ayon kay Ramirez, kailangang mapanatili ng susunod na PSC Board ang magandang performance ng bansa sa mga nakaraang international competitions mula sa Olympic Games sa Tokyo, Japan hanggang sa 31st Southeast Asian Games sa Hanoi, Vietnam.
“If we have to sustain the momentum, we have to provide monetary support, good governance, sports science,” ani Ramirez kahapon sa Philippine Sportswriters Association Forum sa PSC administration building sa Malate, Manila. “Without these provisions, we will not achieve this high level.”
Wala pang katiyakan kung sino ang papalit kay Ramirez sa PSC sa pag-upo ni President-elect Bongbong Marcos sa Malacañang.
Sa liderato ng 70-anyos na si Ramirez ay nakamit ng Pinas ang overall championship nang pamahalaan ang 2019 SEA Games kasunod ang pagbuhat ni weightlifter Hidilyn Diaz sa kauna-unahang Olympic gold.
Nariyan din ang mga tagumpay nina two-time world gymnastics champion Caloy Yulo at World No. 6 pole vaulter Ernest John Obiena.
Ngunit hindi sinosolo ni Ramirez ang tagumpay.
“It was not a lucky break, there was a collaborative effort. The golden year was due mainly to the hard work put up by the athletes and coaches,” wika ng PSC chief.
Date: June 15, 2022 | By: Russell Cadayona | Newspaper: Philippine Star | Source: https://www.philstar.com/pilipino-star-ngayon/palaro/2022/06/15/2188458/momentum-ng-philippine-sports-dapat-maituloy-ramirez
