Lim, iba pang karatekas gagawin lahat para makapasok sa Tokyo Olympics

MANILA, Philippines — Para kay national karateka Jamie Lim, ito na ang pinakahuling tsansa niyang makapaglaro sa 2021 Olympic Games na gagawin sa Tokyo, Japan.

Kaya naman lahat ay kanyang gagawin para manalo sa lalahukang Olympic qualifying tournament sa Hunyo sa Paris.

“Everyone wants to be part of the Olympics, and this is really the last shot,” wika ng 22-anyos na si Lim na inangkin ang gold medal sa women’s kumite individual +61kg event ng 2019 Southeast Asian Games.

 
“I’m gonna do everything I can. I’ll do my best and hope for the best.”

Isa lamang ang anak ni PBA legend Samboy Lim sa mga national athletes na papasok sa ‘bubble’ training sa Inspire Sports Academy sa Calamba, Laguna.

 
Makakasama ng eight-member national karatedo team sa ‘Calambubble’ ang 27-member boxing squad pinamumunuan nina 2021 Tokyo Olympics-bound Irish Magno at 2019 Wo­men’s World Championship gold medalist Nesthy Petecio, at ang five-member taekwondo squad.

Dalawa hanggang tatlong buwan ang itatagal ng nasabing ‘bubble’ para sa tatlong national squads na naghahanda sa Olympic qualifying.

Maliban kay Lim, papasok din sa ‘Calambubble’ sina 2019 SEA Games gold medal winner Junna Tsukii, Joan Orbon at limang iba pang national karatekas na naghahangad ng Olympic berth.

Tatlong karatekas sa bawat weight division ang papasok sa main tournament ng 2021 Tokyo Olympics na nakatakda sa Hulyo 23 hanggang Agosto 8.

Date: January 12, 2021 | By: Russell Cadayona | Newspaper: Philippine Star | Source: https://www.philstar.com/pilipino-star-ngayon/palaro/2021/01/12/2069758/lim-iba-pang-karatekas-gagawin-lahat-para-makapasok-sa-tokyo-olympics?fbclid=IwAR1Q-lQyrO2lLU6Xx1j8n20PzL2Y8ON68Tctg0yROIABVBABtfT4P4kPlZk